Ummagiu à Natale Luciani

Sò deci anni ch’eddu si n’hè andatu u tintu di Natale…. Natale ? U nostru Natale, quiddu di tutti, di stu populu in anda chì cerca sempri a strada nova da campà è da fà campà una tarra, una lingua… un’ ideali ! Natale… U cantadori trimendu di Canta u Populu Corsu, stu ghitarristu mancinu scemu, rossu inciapariddatu, accanitu, arrabiatu, è chì facia sunà a so ghitarra com’è tanti tamburi celesti da indittà ci a via, u militanti di sempri è par lu sempri, Natale tuttu u mondu l’hà cunnisciutu ! Tutti pudemi cuntà una passata cun’ eddu, sia in cuncertu, sia in carrughju, o puru in a vita d’ogni ghjorni chì l’omu ùn era salvaticu mancu à pena, nemmenu monta sega !… Tutti l’emi scontru da quindi o da cullandi, tutti l’avemi vistu ommancu una volta è ci paria di essa di i soi, chì eddu era di i nostri, un Omu… nurmali ! Sò l’omi i più tarcani chì parini di essa parti di a nostra vita, à tempu mitichi ma incarnati, d’un altu ceppu, ma di sangui è di sudori quant’è l’altri, cù i so gioi è i so peni. Omu era, è di prima trinca, cù i so idei beddi assicurati, a so andatura sempri listessa, cù i so verità è i so cuntradizzioni dinò ! Ma omu di stintu, di stantu è di valori ! Unu chì pudia fà cambià una sorti cuntraria da a so prisenza, da u so estru è a so essezza. Natale era di quissi : un omu chì ci era un fanali. Un porta bandera chì ci facia cuddà à l’assaltu di i più pessimi citadeddi, quiddi di u nicà di un populu, quiddi di i falsi prucessi è di i malaceddi chì spufondani stu paesi. U portaluci !!! Ma era omu di fedeltà. À i so cari, à i so amichi è à i so ingaghjamenti primi mai dinicati ne ricusati, puru sapendu chì certi stradi pudiani cunducia à svieri cattivi. Fedeltà è sacrifiziu ! Prima a Corsica… È dopu tuttu u restu. Eppò l’omu nurmali hà scontru a so dea… È sò mutati i so priurità : prima i soi è dopu a Corsica… È pà u restu ? Ci saria statu tempu ! Canta u Populu Corsu, u so ziteddu maiò, Natale l’hà rinvivitu. Li hà resu a so piazza di primura in u cuncertu pulifonicu di i gruppi nascitoghji è altri più anziani. A lita trà naziunalisti l’hà toccu è l’hà feritu, ma s’hè inghjinatu à aiutà à metta ci fini. Ma u tempu ùn l’hè bastatu ! Paria di essa d’aciaghju è di marmaru, di petra ferrigna com’è i stantari di a Filitosa… Ma Falcina pediniedda u si vatava in cor di Dicembri, nantu una strada cunnisciuta è amica, quidda di i lochi di i so amori… È l’hà coltu… Cusì… Com’è biada di Lugliu. Ma suminata hè a so leva nova, cù tanti voci ghjuvanili chì li facini scorta è annunciani un veranu novu è fiuritu, carcu à frutti è a prumessi. L’Omu nurmali, da u so paradisu, vata è cura a banda di a so ghjenti sempri in mossa. È c’hè parsu naturali, à noi altri i so paisani di Bucugnanu, ma dinò paisani di sta tarra di Corsica chì u tenini sempri cusì caru à Natale, di cilibraddu è di renda li ummaghju in cor’ di a prussima Fiera di a Castagna di Dicembri 2013, inghjiru à a so opara, cantata da tutti i gruppi di stu paesi. O Natà ! À populu fattu, bisognu à marchjà ! l[