À Diu…

Eppuru hè scorsa a statina… Una di più, cù i so rimori di vita longu i nostri paisoli, i so infilarati di vitturi è di camiò, di ghjenti in cerca di riposu o di rimenu muntagnolu in quiddi pozzi fiuminaleschi, à attippà monti è scuddicci… Eppuru…

Ma par noi altri paisani bucugnanesi hè stata una statina di dolu, di tristezza, di pienti… « Petit Paul » si n’hè andatu è ci hà lasciati urfaneddi di a so risa, di a so affizzioni, di u so amori ch’eddu sparghjia cù l’altri… pà l’altri !
Quali ùn hà ricordi parsunali cun eddu, stondi sebiati passati ind’è « Lucien » à discorra di u « gaz », à muntà sega à l’unu o à l’altru… à raghjunà nantu à posti murtali (sempri par l’altri !), chjachjarendu nantu u so bateddu è a so pesca da vena, di cosi è d’altri, di a prossima fiera è di l’arrustumu di i ficateddi… Ma sempri cù a primura di renda serviziu : un aiutu à l’unu, una piccatura à l’altru, una cusgitura à un ghjacaru feritu, un basgiu, un gestu affituosu, l’arti di rassicurà à quiddu ch’era toccu da u cancaru (da vicinu o da luntanu !).

È pò… U ganciu malignu u s’hà buscu anch’eddu, ma ùn era nunda… A s’aspittava dicia. L’hà toccu è u s’hà purtatu luntanu luntanu da u so locu di i Quarcioli, tarra di felicità passata, di stondi di dulcezza cù a so carissima Madò.
« Petit Paul » hè biotu u paesi senza tè…

À Diu…